म्याद तामेलीको कार्यविधि

देवानी मुद्दामा फिराद पत्र पत्र दर्ता गरेपछि तीन दिनभित्र प्रतिवादीको नाम म्याद तयार गर्नुपर्दछ भनी देवानी कार्यविधि संहिताको दफा ९९ ले व्यवस्था गरेको छ। त्यस्तो म्याद तीन प्रति तयार गरी वादीले खुलाएको प्रतिवादीको वतनमा अदालतको एक कर्मचारी तामेलदारलाई पठाइन्छ। यसरी पठाएको तामेलदारले सम्बन्धित पक्षको घरमा पुगी भेटे सम्म निजलाई, निजलाई नभेटे उक्त घरको उमेर पुगेको व्यक्तिलाई म्याद बुझाउनु पर्दछ। त्यसरी बुझाउने व्यक्तिलाई एकप्रति म्याद र फिरादपत्रको नक्कल भरपाई गराउनुपर्दछ। प्रतिवादी र निजको घरका उमेर पुगेका व्यक्ति नभेटिएको अवस्थामा उक्त घरको दैलोमा म्याद टाँसी, दुईजना स्थानीय निकायको सदस्य वा कर्मचारी एवं दुईजना साक्षी साथमा राखेको भन्ने कुराको प्रतिवेदन गराई अदालतमा बुझाउनु पर्दछ। निजको घरदैलो पनि पत्ता नलागेमा सोही व्यहोराको प्रतिवेदन अदालतमा पेश गरी कुनै एक राष्ट्रिय दैनिक पत्रिकामा सुचना प्रकाशित गरिन्छ। यसरी सूचना प्रकाशित गरेको मितिलाई नै म्यादतामेलको मिति तोकिन्छ।